ठाणे | प्रतिनिधी –
जिल्हा परिषदेच्या ‘डिजिटल ग्रामशासन’ उपक्रमांतर्गत ठाणे जिल्ह्यातील ग्रामपंचायतींच्या स्थावर व जंगम मालमत्तांची ऑनलाईन नोंदणी सुरू झाली आहे. यामुळे स्थानिक स्वराज्य संस्थांचे संपत्ती व्यवस्थापन अधिक पारदर्शक आणि कार्यक्षम होणार असल्याची माहिती जिल्हा परिषदेचे मुख्य कार्यकारी अधिकारी रोहन घुगे यांनी दिली.
या उपक्रमात जिल्ह्यातील एकूण ९ हजार ४७७ मालमत्तांची माहिती अद्ययावत स्वरूपात संगणकीकृत केली जात आहे. त्यामध्ये ग्रामपंचायतीकडील इमारती, मोकळी जागा, भूखंड, व इमारतीशिवायची जमीन तसेच वाहने, उपकरणे अशा जंगम मालमत्तांचा समावेश आहे.
मालमत्तेची माहिती एका क्लिकवर
मालमत्तांची ही माहिती zpthanemalmattakosh.com या संकेतस्थळावर उपलब्ध करून दिली जात आहे. यासंदर्भात उपमुख्य कार्यकारी अधिकारी (ग्रामपंचायत) प्रमोद काळे यांनी सांगितले की, “मालमत्तेच्या अद्ययावत माहितीचे संकलन अंतिम टप्प्यात आहे. ही माहिती ऑनलाईन झाल्यानंतर ग्रामपंचायतींचे संपत्ती व्यवस्थापन अधिक नियोजनबद्ध पद्धतीने करता येईल.”
डिजिटल ग्रामशासनाची दिशा
“मालमत्तेची अचूक माहिती ही स्थानिक प्रशासनाच्या पारदर्शकतेची गुरुकिल्ली आहे,” असे घुगे म्हणाले. “ही प्रणाली मालमत्तेच्या संरक्षण, नियोजन, देखभाल आणि उत्पन्न वाढ यासाठी उपयुक्त ठरणार आहे. डिजिटल ग्रामशासनाच्या दिशेने हे एक महत्त्वाचे पाऊल ठरेल,” असे ते म्हणाले.