सांगली | ABN News Marathi
सांगली जिल्ह्यातील आटपाडी तालुक्यातील नेलकरंजी गावात एक संतापजनक घटना घडली आहे. NEET चाचणी परीक्षेत कमी गुण पडल्याने, मुख्याध्यापक असलेल्या वडिलांनी आपल्या बारावीच्या वर्गात शिकणाऱ्या मुलीला लाकडी खुंट्याने बेदम मारहाण केली. या मारहाणीत तिचा मृत्यू झाला आहे.
ही घटना शुक्रवारी रात्री 9.30 वाजताच्या सुमारास घडली. मृत मुलगी साधना भोसले ही बारावीच्या विज्ञान शाखेतील विद्यार्थिनी होती आणि डॉक्टर बनण्याचे तिचे स्वप्न होते. पण नीट परीक्षेत कमी गुण पडल्याने तिचे वडील धोंडीराम भोसले, जे गावातील खाजगी शिक्षण संस्थेत मुख्याध्यापक आहेत, प्रचंड संतापले.
घटनाक्रम:
- साधना दोन दिवसांपूर्वी घरात आली होती.
- NEET चाचणी परीक्षेतील गुण समजल्यावर वडिलांचा राग अनावर झाला.
- जात्याच्या लाकडी खुंट्याने बेदम मारहाण करण्यात आली.
- रात्रभर उपचाराशिवाय ठेवले, दुसऱ्या दिवशी वडील शाळेत योग दिनासाठी गेले.
- घरी परतल्यावर मुलगी बेशुद्ध अवस्थेत आढळली.
- रुग्णालयात नेण्यापूर्वीच मृत्यू झाला होता.
पोलीस कारवाई:
या प्रकरणी साधनाची आई प्रीती भोसले यांनी पोलीसात तक्रार दाखल केली असून, आरोपी वडील धोंडीराम भोसले यांना आटपाडी पोलिसांनी रविवारी अटक केली आहे.
हुशार विद्यार्थिनीचा उध्वस्त झालेला स्वप्न
साधनाने दहावीमध्ये 95% गुण मिळवले होते आणि ती डॉक्टर बनण्याचे स्वप्न बाळगून होती. मात्र वडिलांकडूनच मिळालेला मानसिक व शारीरिक त्रास तिच्या आयुष्याचा शेवट ठरला.
सामाजिक प्रश्न:
विद्यार्थ्यांवर अभ्यासाचा ताण, पालकांचा अपार दबाव आणि अपेक्षांच्या ओझ्यामुळे अनेकांची स्वप्नं उद्ध्वस्त होत आहेत. ही घटना केवळ कौटुंबिक हिंसाचाराचीच नव्हे तर शिक्षण व्यवस्थेतील मानसिकतेवर प्रश्नचिन्ह निर्माण करणारी आहे.